ООУ „Вера Циривири Трена“

Музика, театар, носталгија, многу детска енергија и освоено второ место! Вака накратко може да се опише успешниот настап на драмската секција „Глумци од утре“ од ООУ „Вера Циривири – Трена“ на манифестацијата „Карпош има талент 2026“.

Со својата оригинална мултимедијална мини-претстава, симболично насловена „Карпош, пушти посилно!“, нашите млади актери го освоија второто место🥈 и ја поведоа публиката на едно необично патување низ времето, во веселите и незаборавни осумдесетти години на минатиот век.

На сцената оживеа едно старо карпошко маало, во кое децата се собираат покрај стариот телевизор, се дружат, се шегуваат, пеат, танцуваат и сонуваат. Со впечатливи костими инспирирани од модата на 80-тите, многу хумор и ведар дух, нашите ученици ја доловија атмосферата на едно време кога другарството се градеше на маалските улици, а музиката ги поврзуваше генерациите.

Во претставата се испреплетоа музички и театарски моменти. Се потсетивме на детските музички хитови од фестивалот „Златно славејче“, запеавме во ритамот на „Макфест“, а посебна доза хумор внесе адаптираниот извадок од култното театарско дело „Солунски патрдии“.

Така, на едно место се сретнаа македонската музика, театарската традиција, маалското другарство и детската имагинација.

🥈Освоеното второ место е прекрасно признание за креативноста, посветеноста и заедничкиот труд на нашите ученици. Тоа е потврда дека љубовта кон сцената, тимската работа и слободното уметничко изразување создаваат резултати со кои сите се гордееме.

Но, најубавото во овој настап не беа само костимите, песните, сценографијата и наградата. Најубави беа насмевките, заедништвото и искрената радост на децата кои покажаа дека талентот добива вистинска вредност кога се споделува со другите.

Ментор и автор на сценската концепција е м-р Матилда Бајкова, која заедно со учениците ја подготви оваа музичко-театарска приказна.

Особена благодарност упатуваме до родителите Лео Голчев, Маја Љутков и Ѓоко Стојановски, кои со својата несебична помош, поддршка и ангажираност придонесоа за реализацијата на настапот.

Со освоеното второ место, „Глумци од утре“ уште еднаш покажаа дека училиштето е место каде што се негуваат креативноста, уметничкото изразување, соработката и љубовта кон македонското културно наследство.

Горди сме на нашите млади таленти!

Карпош, пушти посилно! Нека се слушнат песната, смеата и гласот на нашите млади актери!