ООУ „Вера Циривири Трена“

Со особено задоволство споделуваме уште еден значаен резултат од нашето учество во европскиот проект FASTEAM.

Како партнер во проектот, ООУ „Вера Циривири-Трена“ – Скопје заедно со партнерските организации од Холандија, Хрватска и Словенија учествуваше во развојот на TOGETHER Tool – практичен прирачник создаден со идеја да го поттикне поврзувањето на училиштето и семејството преку заедничко STEAM учење.

TOGETHER Tool е наменет за наставници и родители и нуди практични насоки, идеи и активности кои ги поврзуваат науката, технологијата, инженерството, уметноста и математиката со учењето во секојдневниот живот.

Неговата посебна вредност е во тоа што поттикнува заедничко учење и истражување. Децата и родителите се охрабруваат заедно да поставуваат прашања, да експериментираат, да размислуваат, да создаваат и да бараат решенија. На тој начин, учењето станува можност не само за стекнување нови знаења, туку и за разговор, соработка и квалитетно поминато време со семејството.

Прирачникот содржи различни активности кои можат да се реализираат со едноставни материјали и во домашни услови. Преку нив децата имаат можност на забавен и практичен начин да ги применат своите знаења и да ги развиваат љубопитноста, креативноста, критичкото размислување и вештините за решавање проблеми.

За нас е особено значајно што ООУ „Вера Циривири-Трена“ – Скопје беше дел од процесот на создавање на оваа алатка. Нашето учество во проектот ни овозможи да споделуваме искуства, идеи и добри практики со партнерите и заеднички да придонесеме кон создавање ресурс кој може да биде корисен за образовната заедница.

Конечната верзија на TOGETHER Tool е достапна онлајн и може да ја користат наставници, родители и сите заинтересирани за примена на интересни и практични STEAM активности во учењето.

Прирачникот можете да го најдете на веб-страницата на проектот FASTEAM:

👉 Прочитај повеќе

Создаваме заедно – за учење кое ги поврзува децата, семејствата и училиштето.